අම්මාගේ පාපැදි රන් කිරුළ පුතුගේ තුරුලට.
දෙවතාවක්ම ක්‍රීඩාවට සමුදී නැවැත ඔලිම්පික් තරග බිමට පැමිණි ඇමරිකානු පාපැදි ශූරී ක්‍රිස්ටින් ආම්ස්ට්‍රෝන් කාන්තා ඒකල මාර්ග ධාවන කාලය මැනීමේ තරගයේදී රන් පදක්කම දිනා ගනියි.
ක්‍රිස්ටීන් ආම්ස්ට්‍රෝන් මාර්ග ධාවන පාපැදි කාලය මැනීමේ තරගයේදී විනාඩි 44: 26. 42ක කාලයක් වාර්තා කරමින් රන් පදක්කම දිනා ගනිද්දී රුසියාවේ ඔල්ගා සැබලෙන්සිකියා විනාඩි 5.55කින් පසුපසින් සිට රිදී පදක්කම දිනා ගත්තාය.
විශ්‍රාම ගොස් නැවැත ක්‍රීඩාවට පැමිණ රන් පදක්කමක් දිනූ ක්‍රීඩිකාව ලෙස ඇය ඔලිම්පික් ඉතිහාසයට එක් වූවාය. මේ එක් දරු මවගේ වයස ඊයේ දිනට හරියටම අවුරුදු 42ක් විය.
මේ දිරිය කාන්තාව ඔලිම්පික් තරග බිමේ පිට පිට රන් පදක්කම් තුනක් දිනාගත් වයස්ගතම පාපැදි ක්‍රීඩිකාව ලෙස දැන් ඉතිහාසගත වී හමාරය.
වයස ඇයට ප්‍රශ්නයක් නොවේ. අධිෂ්ඨානයේ ප්‍රබලත්වය ඇයගේ ධෛර්යය වේ. දිනාගත් රන් කිරුළ පුතුට ලං කිරීම තරම් කවත් සතුටක් ඇයට නොමැත. වෘත්තීයෙන් ඇමෙරිකාවේ ප්‍රජා සෞඛ්‍ය අධ්‍යක්ෂකවරියක්වූ ක්‍රිස්ටීන් 2008 බීජින් ඔලිම්පික් උළෙලේ හා 2012 ලන්ඩන් ඔලිම්පික් උළෙලේ මාර්ග ධාවන කාලය මැනීමේ තරගයේදී රන් පදක්කම දිනා ගත්තාය.