ඉන්දීය අග්‍රාමාත්‍ය නරේන්ද්‍ර ශ්‍රී මෝඩි අද ලංකාවට.
අන්තර්ජාතික වෙසක් උත්සවයට සහභාගි වීම සඳහා ඉන්දීය අග්‍රාමාත්‍ය නරේන්ද්‍ර ශ්‍රී මෝඩි අද (11දා) පස්වරු 5.30ට කටුනායක බණ්ඩාරනායක ජාත්‍යන්තර ගුවන් තොටුපොළෙන් ශ්‍රී ලංකාවට පැමිණීමට නියමිතය.
කටුනායක අධිවේගී මාර්ගය ඔස්සේ කොළඹට සපැමිණෙන අග්‍රාමාත්‍ය මෝඩි රාත්‍රි 7ට අරලියගහ මන්දිරය හා ගංගාරාම විහාරස්ථානය ඒකාබද්ධව සංවිධානය කරන බුද්ධ රශ්මි වෙසක් කලාපය විවෘත කිරීමට ශ්‍රී ලංකා අග්‍රාමාත්‍යවරයා සමඟ එක්වෙයි. අනතුරුව ජනාධිපති මෛත්‍රිපාල සිරිසේන මෝඩි අගමැතිවරයා වෙනුවෙන් පිරිනමන රාත්‍රි භෝජන සංග්‍රහයට සහභාගි වෙයි.
බණ්ඩාරනායක ජාත්‍යන්තර සම්මන්ත්‍රණ ශාලාවේදී හෙට (12දා) උදේ ඇරැඹෙන අන්තර්ජාතික වෙසක් සමුළුවේ ප්‍රධාන ආරාධිතයා ලෙස සහභාගි වන අග්‍රාමාත්‍ය මෝඩි හෙට දහවල් ඉන්දීය රජයේ ආධාර ඇතිව ඉදිකළ හැටන්, දික්ඔය රෝහලේ නව ගොඩනැඟිලි සංකීර්ණය විවෘත කිරීමටත් අනතුරුව හැටන් ඩන්බාර් ක්‍රීඩාංගණයේ පැවැත්වෙන රැස්වීමක් ඇමැතීමටත් නියමිතය.
ඉන් අනතුරුව මහනුවර බලා යන ඉන්දීය අග්‍රාමාත්‍යවරයා සවස් වරුවේ ශ්‍රී දළදා මාලිගයේදී විශේෂ දළදා පූජාවකට සහභාගිවීමෙන් පසු කොළඹ බලා පැමිණ පසුදා සවස නවදිල්ලිය බලා පිටත්ව යෑමට නියමිතය.