මූලික නීතියට සහය අවශ්‍යයි විපක්ෂ නායක ආර්.සම්බන්ධන්
ශ්‍රී ලංකාවේ අලුතින් කෙටුම්පත් කෙරෙන නව ආණ්ඩුක්‍රම ව්‍යවස්ථාව දකුණේ දේශපාලන බලවේග පමණක් පිළිගන්නා මූලික නීතියක් නොව රටේ සියළු ජන කොටස් එකඟ වෙන එකක් විය යුතු යයි විපක්ෂ නායක ආර්. සම්බන්ධන් පවසයි .
විපක්ෂ නායකයා එම ප්‍රකාශය කළේ වවුනියාවේ පැවැති දෙමළ ජාතික සන්ධානයේ සාකච්ඡාවකින් අනතුරුව මාධ්‍ය හමුවකදී ය.
නව ආණ්ඩුක්‍රම ව්‍යවස්ථාව සම්පාදනයේ දී සැලකිලිමත් විය යුතු කරුණු පිළිබදව දෙමළ ජාතික සන්ධානයේ නායකයින් අවධානය යොමු කළ බව පැවසූ විපක්ෂ නායකවරයා තමන් ඒ වෙනුවෙන් මුලින්ම රජයට ඉදිරිපත් කරණ ලද යෝජනාවලියේ කිසිදු වෙනසක් නොමැති බව සඳහන් කළේය.
නව ව්‍යවස්ථාවක් සම්පාදනය කිරීමේ දී උතුරු නැගෙනහිර පළාත් දෙක එකට එකතු කොට දෙමළ ජනතාව විසින් පිළිගනු ලබන ඒකීය රාජ්‍යයක් තුළ බලය බෙදා හැරෙන ෆෙඩරල් පාලන ව්‍යුහයක් දෙමළ ජාතික සන්ධානය විසින් මීට පෙර රජයට යෝජනා කරනු ලැබූ අතර එම යෝජනවළිය මීට පෙර උතුරු පළාත් සභාව විසින් ද සම්මත කළේය.