විදුලියේ වර්ජනයක්.

වැටුප් විෂමතාවය නිවැරදි නොකිරීමට හා වැටුප් විෂමතාවය නිවැරදි කරන ලෙස ඉල්ලා වෘත්තීය ක‍්‍රියාමාර්ගවලට සම්බන්ධ වූ සේවකයන් වෙත මර්දනය දියත්කිරීමට එරෙහිව ලංකා විදුලිබල මණ්ඩලයේ ඒකාබද්ධ වෘත්තීය සමිති සන්ධානයට සම්බන්ධ වෘත්තීය සමිති 32ක් විසින් අද (05) මධ්‍යම රාත්‍රී 12න් පසු හෙට (06) මධ්‍යම රාත්‍රී 12 වනතෙක් පැය 24ක සමස්ත මහා වැඩවර්ජනයක් කැඳවා ඇතැයි ලංවිම ඒකාබද්ධ වෘත්තීය සමිති සන්ධානයේ වෙනුවෙන් ලංකා විදුලි සේවක සංගමයේ ප‍්‍රධාන ලේකම් රන්ජන් ජයලාල්  සඳහන් කරයි.

2015 වර්ෂයේදී විදුලිබල මණ්ඩලයේ සේවකයන්ට 30%කින් වැටුප් ඉහළ නැංවීමෙන් පසුව ඉන්ජිනේරු සංගමය 70% සිට 120%කින් පමණ තමන්ගේ වැටුප් වැඩි කරගෙන ඇති බව සඳහන් කරන විදුලිබල මණ්ඩලයේ සෙසු වෘත්තීය සමිති එම 120% වැටුප් වැඩිවීම තමන්ටද ලබාදෙන ලෙස ඉල්ලා සිටී.

ඒ සම්බන්ධව ඇමැතිවරයා ඇතුළු බලධාරීන් සමඟ සිදුකළ සාකච්ඡා ඵලදායී නොවූ නිසා පසුගියදා වැඩවර්ජනයක නිරත වූ බවත් එම වැඩවර්ජනයට සහභාගී වූ සේවකයින් සඳහා පාලකයින් සිය මර්ධනය දියත්කරමින් සිටින බවත් රංජන් ජයලාල්  සඳහන් කරයි.

වැඩ වර්ජනය හේතුවෙන් හදිසි බිඳවැටීම් යථා තත්ත්වයට පත් කිරීමක් එදින සිදුනොවන බවත් ලංවිම විදුලි අයපත් භාරගැනීමේ කවුළු සියල්ලද වසා දැමෙන බවත් ඔහු සඳහන් කරයි.

දිවයින පුරා සියලු බලාගාර, කාර්යාල සහ වැඩබිම්වල විදුලි සේවකයෝ එම වර්ජනයට සහාය ලබාදෙන බවත් දේශපාලන භේදයකින් තොරව ජාතික සේවක සංගමය, ලංවිම නිදහස් සේවක සංගමය, ලංවිම විදුලි සේවක සංගමය ඇතුළු වෘත්තීය සමිති 32ක් වර්ජනයට එකතු වන බවත්  සදහන්ය.