බැඳුම්කර සිදුවීම සම්බන්ධයෙන් කෝප් කමිටු වාර්තාව පාර්ලිමේන්තු මහ ලේකම්වරයා විසින් නීතිපතිවරයාට යොමුකිරීමෙන් පසුව ඒ පිළිබඳ නීතිපති යොමු කරන ලද ලිපිය කථානායකවරයා විසින් පාර්ලිමේන්තුවේ සභාගත කර ඇත.බැඳුම්කර ගනුදෙනුවලදී ඊට කෙලින්ම සම්බන්ධ පාර්ශවයක් කිසියම් අලාභයක් කර ඇත්නම් රජයට එම අලාභය අය කර ගත හැකි බව නීතිපතිවරයා ඉන් දන්වා ඇත.
බැඳුම්කර ගනුදෙනු සම්බන්ධයෙන් අපරාධ පරික්ෂණයක් කිරීම සඳහා පොලිස් පැමිණිල්ලක් අත්යවශ්යය බවද නීතිපතිවරයා විසින් නිකුත් කළ එම ලිපියේ දැක්වේ.
දැනටමත් වත්මන් මහ බැංකු අධිපතිවරයා එම පැමිණිල්ල කර ඇති බැවින් කඩිනම් විමර්ශනයක් කර කරුණු වාර්තා කරන්නැයි අපරාධ පරික්ෂණ දෙපාර්තමේන්තුවට උපදෙස් දී ඇති බවත් සිදුකෙරෙන පරීක්ෂණවල ප්රගතිය දැක්වෙන වාර්තාවක් තමන් වෙත යොමුකරන ලෙස දන්වා ඇති බවත් නීතිපතිවරයා පවසයි.
නීතිපතිවරයාගේ ලිපියේ වැඩිදුරටත් දැක්වෙන්නේ පාඩු අය කර ගැනීමට පෙර අධිකරණයක් ඉදිරියේ එය සාධාරණ අයුරින් ගණනය කළ යුතු බව ය.