2011 ලෝක කුසලාන අවසන් තරඟය ගැන පරීක්‍ෂණයක් ඕන..! හිටපු ක්‍රීඩා ඇමති මහින්දානන්ද කියයි.
“2011 ලෝක කුසාලාන අවසන් තරඟය ක්‍රීඩා කළ ආකාරය ගැන සැකකටයුතු තැන් කීපයක් තිබුණා. එදා මම ඒ ගැන පරීක්‍ෂණයක් ආරම්භ කරන්න එදා සිටි පාලකයින්ට දැනුම් දුන්නා.ඒත් පාලක මණ්ඩලයේ වුණු වෙනසක් එක්ක ඒ සේරම නතර වුණා. ඇත්තටම ඒ ගැන පරීක්‍ෂණයක් කළ යුතුයි.” යැයි හිටපු ක්‍රීඩා ඇමති මහින්දානන්ද අලුත්ගමගේ පවසයි.
“අන්තිම තරඟයට කලින් දවසේ අපිට කිසිම දැනුම්දීමක් නොකර ක්‍රීඩකයෝ 7 දෙනෙක් මාරු කරලා තිබුණා. ඒ වගේම තරඟය තිබුණු දවසේ අපේ ප්‍රබල ක්‍රීඩකයෙක් ක්‍රීඩාගාරය ඇතුළේ සිගරට් 55 ක් බිව්වා කියලා කළමණාකරුගේ වාර්ථාවේ තිබුණා. තරඟාවලිය ඉවර වුණු ගමන්ම නායකයා නායකත්වයෙන් ඉල්ලා අස්වීමේ ලිපිය භාර දුන්නා, කිසිම හේතුවක් නැතුව” යැයි ද ඒ හිටපු ක්‍රීඩා අමාත්‍යවරයා වැඩි දුරටත් ඒ ගැන විස්තර කළේය.
මීට පෙර අර්ජුන රණතුංග හිටපු ශ්‍රී ලංකා නායකයා 2011 අවසන් තරඟය ගැන පරීක්‍ෂණයක් ඉල්ලා සිටියේය. ඒ ශ්‍රී අලංකා ක්‍රිකට් හිටපු නායක කුමාර සංගක්කාර 2009 ලාහෝර් ප්‍රහාරය ගැන පරීක්‍ෂණයක් ඉල්ලා සිටි අවස්ථාවේදීය.