ඉස්ලාමීය රාජ්ය සංවිධානයට එරෙහි යුද්ධය අවසන් බව ඉරාකය ප්රකාශයට පත් කරයි.
බැග්ඩෑඩ් අගනුවර පැවති සම්මන්ත්රණයක් අමතමින් අගමැති හයිදර් අල් අබාඩි කියා සිටියේ ඉරාක – සිරියානු දේශ සීමා කලාපයේ සම්පූර්ණ පාලනය ඉරාක හමුදාව අතට පත්ව ඇති බවය.
පසුගිය නොවැම්බර් මාසයේ දී අයිඑස් සංවිධානය සතුව තිබු රාවා නගරයේ බලය ඔවුන් අතින් ගිලිහුණු අතර එම සංවිධානයේ පාලනය දේශ සීමා කලාපයේ ප්රදේශ කිහිපයකට පමණක් සීමා වුණි.
ඉරාකය ඉහත කී නිවේදනය ප්රකාශයට පත් කළේ අයිඑස් සංවිධානය පරාජයට පත් කිරීම සඳහා අසල්වැසි සිරියාව තුළ ගෙන ගිය මෙහෙයුම අවසන් කළ බව රුසියානු හමුදාව විසින් ප්රකාශයට පත් කරනු ලැබීමෙන් දින දෙකකට පසුවය.
2014 වසරේ දී ජිහාඩ් කණ්ඩායම විසින් සිරියාවේ සහ ඉරාකයේ විශාල භූමි ප්රදේශයක් සිය පාලනයට නතු කර ගනු ලැබ තිබිණි.
එම කලාප ඉස්ලාමීය රාජ්යයක් වශයෙන් ප්රකාශයට පත් කරනු ලැබූ අතර මිලියන දහයකට අධික සංඛ්යාවක් දැඩි නීතිවලට යටත් කරනු ලැබීය.
නමුත් පසුගිය වසර දෙකක කාලය තුළ ඉස්ලාමීය රාජ්යය සතුව තිබූ භූමි ප්රදේශ ගණනාවක් ඔවුන්ට අහිමි විය.
2017 වසරේ ජුලි මාසයේ දී ඉරාකයේ දෙවන විශාලතම නගරය වන මොසුල් නුවර බලය ඔවුන්ගෙන් ගිලිහිණි.
ඉස්ලාමීය රාජ්යයේ අගනුවර ලෙස සලකුණු සිරියාවේ රකා නගරය ඔවුන්ට අහිමි වුයේ පසුගිය නොවැම්බර් මාසයේදීය.
අයිඑස් කැරලිකරුවන්ගෙන් සමහරෙකු සිරියාවේ ගම්බද ප්රදේශ වෙත පළා ගොස් ඇති බව වාර්තා විය.
සෙසු පිරිස තුර්කි දේශ සීමාවෙන් ඔබ්බට පළා ගොස් ඇතැයි විශ්වාස කෙරේ.
අයිඑස් සංවිධානයට එරෙහිව පැවති සටහන යුදමය වශයෙන් අවසන්ව ඇතත් ඉරාකයේ, සිරියාවේ හෝ බාහිර ලෝකය තුළ එම සංවිධානයේ මතවාදයට එරෙහිව පවතින සටන හෝ ඔවුන්ට කැරලිගැසීමට ඇති හැකියාව අවසන්ව ඇතැයි ඉන් අදහස් නොකෙරෙන බව අරාබි කටයුතු පිළිබඳ බීබීසී සංස්කාරක සෙබෙස්තියන් ඌෂර් පවසයි.
පෙරට සාපේක්ෂව ප්රහාර එල්ල වීම අඩු වශයෙන් සිදු විය හැකි වුවත් ඉරාකයේ නගර තවමත් මරාගෙන මැරෙන බෝම්බ ප්රහාරවලට ලක්වීමේ අවදානමක පවතින බව ඔහු පෙන්වා දෙයි.
ඉස්ලාමීය රාජ්යයට එරෙහි සටන සහ එහි ගමන් මග
- 2014 ජනවාරි: ඉරාකය තුළ ඉස්ලාමීය රාජ්යයක් වෙනුවෙන් පෙනී සිටින කැරලිකරුවන් විසින් ෆලුජා සහ රමාඩි නගරවල බලය අල්ලා ගනු ලැබීය
- 2014 ජුනි: දින හයක සටනකින් පසු ඉරාකයේ දෙවන විශාලතම නගරය වන මෝසුල් ජිහාඩ් කණ්ඩායමේ පාලනයට යටත් විය
- 2014 ජුනි 29: ISIL නමින් පෙනී සිටි ජිහාඩ් කණ්ඩායම ඉස්ලාමීය රාජ්ය වශයෙන් සිය නම වෙනස් කරගත් අතර අබු බකර් අල් බග්දාදීගේ නායකත්වයෙන් යුතු ඉස්ලාමීය රාජ්යයක් ප්රකාශයට පත් කරනු ලැබීය
- 2014 අගෝස්තු: සින්ජාර් නගරය අයිඑස් පාලනයට පත් විය. සාමාන්ය වැසියන් දෙලක්ෂයකට ආසන්න සංඛ්යාවක් සින්ජාර් කඳු ප්රදේශ වෙත පළා ගියහ. ඉන් වැඩි දෙනෙක් යසිදිස් ජන කොට්ඨාසයට අයත් වූහ. ගුවන් ප්රහාර සඳහා ඇමරිකාවේ සහාය හිමි විය
- 2015 මාර්තු: ඉරාක හමුදා සහ මිත්ර ෂියා මුස්ලිම් කැරලිකරුවන් විසින් ටික්රිට් නගරයේ බලය යළි ලබා ගනු ලැබීය
- 2015 දෙසැම්බර්: රමාඩි නගරයේ බලය යළි ලබා ගැනීමට සමත් විය
- 2016 ජුනි: ෆලුජා නගරයේ බලය යළි ලබා ගැනීමට සමත් විය
- 2016 ඔක්තෝම්බර්: ඉරාක හමුදා, මිත්ර ෂියා මුස්ලිම් කැරලිකරුවන්, කුර්දි සටන් කණ්ඩායම් සහ ජාත්යන්තර මිත්ර හමුදා විසින් මෝසුල් නගරය වටලනු ලැබීය
- 2017 ජුලි: මෝසුල් නගරයේ බලය යළි ලබා ගැනීමට සමත් විය
- 2017 දෙසැම්බර්: ඉස්ලාමීය රාජ්ය සංවිධානයට එරෙහි යුද්ධය අවසන් බව ඉරාක අගමැතිවරයා විසින් ප්රකාශයට පත් කරනු ලැබීය
(BBC)