සයිටම් සටන දියාරු කිරීමේ වැඩපිළිවෙලක රජයේ වෛද්‍ය නිලධාරින්ගේ සංගමය කටයුතු කරනවා?
සයිටම් සටන දියාරු කිරීමේ වැඩපිළිවෙලක දැන් රජයේ වෛද්‍ය නිලධාරින්ගේ සංගමය කටයුතු කරන්නේද යන සැකය, ශිෂ්‍ය ව්‍යාපාරය තුල මතුව එන බව ශිෂ්‍ය ක්‍රියාකාරිකයන්ගේ අදහස වී ඇති බව සදහන් වේ, ජනාධිපතිවරයා සමග රජයේ වෛද්‍ය නිලධාරින්ගේ සංගමය එකගවු කරුණු පිළිබදව ශිෂ්‍ය ව්‍යාපාරය එකඟ නොවන බවත් සයිටම් අහෝසි කිරීම සහ වත්මන් යහපාලන ආණ්ඩුව සිසුන්ගේ උද්ඝෝෂණ සිදුකිරීමේ ප්‍රජාතත්ත්‍රවාදී අයිතිය කප්පාදු කිරීමට එරෙහිව ජනතාව පෙළ ගැස්වීමට තමන්ඉදිරියටත් කටයුතු කරන බව කොළඹ විශ්වවිද්‍යාලයේ වෛද්‍ය පීඨ ශිෂ්‍ය ක්‍රියාකාරි කමිටුවේ හිටපු ශිෂ්‍ය ක්‍රියාකාරියකු කියා සිටියි.
මේ අතර, මාළඹේ පෞද්ගලික වෛද්‍ය විද්‍යාලයට එරෙහිව සහ අන්තර් විශ්වවිද්‍යාල ශිෂ්‍ය බල මණ්ඩලයේ සිසුන්ට සෞඛ්‍ය අමාත්‍යාංශයේ දී පොලිසිය පහරදීමට විරෝධය පළ කරමින් ගම්පහ දුම්රිය ස්ථානය ඉදිරිපිට අද පස්වරුවේ විරෝධතාවයක් පැවැත්විණ.
ඒ සදහා ගම්පහ දිස්ත්‍රික් වෛද්‍ය පීඨ ශිෂ්‍ය දෙමාපිය සංගමය මෙන්ම රාගම වෛද්‍ය පීඨයේ සිසුන් පිරිසක් ද එක්ව සිටියේය.
එසේම මෙම සිද්ධියට විරෝධය පළ කරමින් පේරාදෙණිය විශ්වවිද්‍යාලයේ සිසුන් පිරිසක් ද අද ගලහ මංසන්ධියේ විරෝධතාවක නිරත විය.