පිස්තෝල පෙන්නා මුදල් මංකොල්ල කෑ, පොහොට්ටු නගරාධිපති බන්ධනාගාරයට.
ශ්‍රී ලංකා පොදුජන පෙරමුණ(පොහොට්ටුව ) නියෝජනය කරන කුරුණෑගල නගරාධිපති තුෂාර සංජීව විතාරණ සැප්තැම්බර් 17 වැනිදා දක්වා රක්ෂිත බන්ධනාගාර ගත කිරීමට කුරුණෑගල මහාධිකරණ විනිසුරු මේනකා විජේසුන්දර නියෝග කර ඇති බව වාර්තා වේ .
අධිකරණය මඟහැරියේ යැයි කුරුණෑගල මහාධිකරණය විසින් අත්අඩංගුවට ගැනීම සඳහා ඔහුට වරෙන්තු නිකුත් කර තිබේ.
නගරාධිපතිවරයා මෝසමක් මඟින් අද (9) අධිකරණයට ඉදිරිපත් වීමෙන් පසුව මෙලෙස රක්ෂිත බන්ධනාගාර ගත කෙරිණි.
පිස්තෝලයක් පෙන්වා පුද්ගලයකු බිය ගන්වා මුදල් කොල්ලකෑවේ යැයි චෝදනා එල්ල කර පුද්ගලයන් සිව්දෙනෙකුට එරෙහිව කුරුණෑගල මහාධිකරණයේ විභාග වන නඩුවක කුරුණෑගල නගරාධිපති තුෂාර සංජීව විතාරණ පළමුවැනි විත්තිකරු ලෙස නීතිපතිවරයා විසින් නම්කර ඇත.