කැනඩාවට කුලී ඝාතකයින් යැවූ බවට චෝදනා.
හිටපු බුද්ධි අංශ නිලධාරියෙකු මරා දැමීම සඳහා කැනඩාව වෙත ඝාතකයන් කණ්ඩායමක් යැවූ බවට සෞදි ඔටුන්න හිමි කුමරු මොහොමඩ් බින් සල්මාන් වෙත චෝදනා එල්ල වී තිබේ. මාධ්‍යවේදී ජමාල් කශෝගි තුර්කියේදී ඝාතනයට ලක් වී කෙටි කලක් තුළ බුද්ධි අංශ නිලධාරී සාද් අල් ජබ්‍රි මරා දැමීමට ගත් උත්සාහය ව්‍යර්ථ වී ඇති බව එක්සත් ජනපදයේ ගොනු කර ඇති අධිකරණ ලිපිගොනු මගින් පැවසේ. සෞදි අරාබි ආණ්ඩුව වෙනුවෙන් කටයුතු කළ පළපුරුදු අයෙකු වූ අල් ජබ්‍රි තෙවසරකට ඉහතදී එරටින් පලා ගියේය.
61 හැවිරිදි අල් ජබ්‍රි වසර ගණනාවක් සෞදි අරාබියේ ක්‍රියාත්මක බ්‍රිතාන්‍ය M16 සහ සෙසු බටහිර ඔත්තු සේවා සමග අතරමැදියෙකු වශයෙන් කටයුතු කළ අයෙකි.