ලාංකිකයින් සමග නැවක් UAE අත්අඩංගුවේ.
ශ්‍රී ලාංකික නැවියන් 08 දෙනෙකු සමග නෞකාවක් එක්සත් අරාබි එමීර් රාජ්‍ය මගින් අත්අඩංගුවට ගෙන තිබේ.
එක්සත් අරාබි එමීර්හි ෆුජේරා සමුද්‍ර ආරක්ෂක බලකාය අල් කලිතියා නමැති එම නෞකාව අත්අඩංගුවට ගෙන ඇත්තේ නීති විරෝධී කටයුතුවල නිරත වී ඇති බවට 3 වන පාර්ශවයක් මගින් නඩු පැවරීම හේතුවෙනි.
එක්සත් අරාබි එමීර් රාජ්‍ය ප්‍රදේශ 7කින් නිර්මාණය වී ඇති අතර ෆුජේරා යනු එහි එක් ප්‍රදේශයකි.
මේ වන විට අල් කලීතියා නමැති එම නෞකාව ෆුජේරා ආශ්‍රිත මුහුදේ නැංගුරම් ලා තිබේ.
කෙසේ වෙතත් එම නෞකාව අයත් රට හෝ එය කුමන ගමනාන්තයක් දක්වා යාත්‍රා කරමින් සිටියේ ද යන්න සහ අත්අඩංගුවට ගන්නා අවස්ථාවේදී එහි තිබූ භාණ්ඩ පිළිබඳව මෙතෙක් වාර්තා වී නොමැත.
ඒ සම්බන්ධයෙන් LNC ඩුබායිහි ශ්‍රී ලංකා කොන්සියුලර් ජෙනරාල් චරිත යත්තෝගොඩ ගෙන් විමසීමක් කළේ ය.
ඔහු පැවසුවේ එම ශ්‍රී ලාංකිකයින් සම්බන්ධයෙන් මේ වන විටත් කටයුතු කරමින් සිටින බව ය.
සන්නිවේදන කටයුතු දුර්වල වීම හේතුවෙන් අදාළ ශ්‍රී ලාංකිකයින් සම්බන්ධ කර ගැනීමේ ගැටලු පවතින බව ත් ඔහු සඳහන් කළේ ය.