සයිටම් එපා,විශ්‍රාම වැටුප අහෝසි නොකරණු, එට්කා එපා,-එක් දින සංකේත වැඩ වර්ජනය අද.
සයිටම් ආයතනය ජනසතු කිරීම, විශ්‍රාම වැටුප අහෝසි කිරීමේ ක්‍රමවේදය හකුළා ගැනීම, ජාතික ප්‍රතිපත්ති සම්පාදනයකින් තොරව එට්කා වැනි අන්තර්ජාතික වෙළෙඳ ගිවිසුම් අත්සන් කිරීම මඟින් මෙරට රැකියා වෙළඳපොළ අනතුරේ හෙළීම හා ජාතික සම්පත් හිතුමතේ විකුණා දැමීම වහා වැළැක්වීම යන කාරණා මුල් කර ගනිමින් වැඩ වර්ජනයක් අද ක්‍රියාත්මක කරන බව රජයේ වෛද්‍ය නිලධාරින්ගේ සංගමය පවසයි. එය අද (05) උදෑසන 8 සිට ආරම්භ කරන බවත් එම වැඩ වර්ජනයට වෘත්තීය සමිති 100 ක පමණ ඍජු දායකත්වයක් ලබාදෙන බවත් වෘත්තීය සමිති 161 ක සහාය මේ සඳහා ලබාදෙන බව සදහන්ය.
වැඩ වර්ජනය ක්‍රියාත්මක වුවද රෝහල්වල හදිසි ප්‍රතිකාර කටයුතු හා ශල්‍යකර්ම සිදු කිරීමට වෛද්‍යවරුන් යොදවා ඇති බවත් වැඩ වර්ජනය හේතුවෙන් කිසිදු රෝගියකුගේ ජීවිතයට හානියක් වීමට ඉඩ නොතබන බවත් කොළඹ රිජ්වේ ආර්යා ළමා රෝහල, පේරාදෙණිය සිරිමාවෝ බණ්ඩාරනායක ළමා රෝහල, මෘතෘ රෝහල්, අපේක්ෂා රෝහල, වකුගඩු රෝහල යනාදියෙහි වැඩ වර්ජනයට සහභාගි කර නොගනියි. සයිටම් අර්බුදය සඳහා රජය විසඳුමක් ලබා නොදුන්නොත් වැඩ වර්ජනය සම්බන්ධයෙන් අවසාන තීරණය ලබන 9 වැනිදා පැවැත්වෙන රජයේ වෛද්‍ය නිලධාරින්ගේ සංගමයේ මධ්‍යම කාරක සභාවේදි ගැනීමට නියමිත බවද සදහන්ය.