දෙමළ සිරකරුවන් නිදහස් කරන්න. යාපනය විශ්ව විද්‍යාලයේ සියළුම ගේට්ටු වසයි.
යුද සමයේ අත්අඩංගුවට පත් දෙමළ සිරකරුවන් නිදහස් කරන ලෙස ඉල්ලා යාපනය විශ්ව විද්‍යාල සිසුහු අදත් (ඔක් 30) විරෝධතාවක නිරත වූහ.
විරෝධතාවේ නිරත සිසුන් විසින් යාපනය විශ්ව විද්‍යාලයට ඇතුළු වීම සඳහා ඇති සියලුම ගේට්ටු වසා දමනු ලැබ ඇත.
සිය ඉල්ලීම් සඳහා විසඳුම් ලැබෙන තෙක් විශ්ව විද්‍යාලයේ පරිපාලනමය කටයුතු අඩපණ කිරීම තම අරමුණ බව සිසුහු පවසති.
දෙමළ සිරකරුවන් නිදහස් කිරීම ඇතුළු ඉල්ලීම් කිහිපයක් මුල් කර ගනිමින් යාපනය විශ්ව විද්‍යාල සිසුහු පසුගිය 19 වෙනිදා පන්ති වර්ජනයක් ආරම්භ කළහ.
වව්නියාව බන්ධනාගාරයෙන් අනුරාධපුර බන්ධනාගාරයට මාරු කර යවන ලද දෙමළ රැඳවියන් යළි වව්නියාව වෙත මාරු කරන ලෙසත් ඔවුහු ඉල්ලා සිටිති.
“දෙමළ දේශපාලන සිරකරුවන්” නිදහස් කරන මෙන් ඉල්ලා පසුගිය කාලය තුළ උතුරේ විරෝධතා ව්‍යාපාර ගණනාවක් පැවත්වුණි.