යුස්රා මර්දිනි 2016 ඔලිම්පික් සරණාගත කිදුරිය.

යුස්රා මර්දිනි දහ අට හැවිරිදි සිරියානු ජාතික පිහිනුම් ක්‍රීඩිකාවක්. ඇය ජීවත් වූ ප්‍රදේශයට එල්ල වූ දැඩි බෝම්බ ප්‍රහාර හමුවේ යුස්රා ඇතුළු ඇයගේ පවුලේ සාමාජිකයන් සිරියාවෙන් පලා යන්නේ සිය ජීවිත පිළිබද දැඩි අවදානමක් ගනිමින්. ඒ මධ්‍යධරනී මුහුද හරහා කුඩා ඩිංගි බෝට්ටුවක නැගී සිරියාවෙන් පිටවීමෙන්.

ග්‍රීසියේ ලෙස්බොස් දූපතට මිනිත්තු තිහකින් ලඟා විය හැකි දුරකට පැමිණෙන යුස්රා පැමිණි බෝට්ටුව මුහුද මැද නතර වෙන්නේ කාර්මික දෝෂයක් හේතුවෙන්. ඇය සිය සොහොයුරිය සහ තවත් තරුණියකගේ සහය ඇතිව විසි දෙනෙකුට අධික සරණාගතයන් සිටි බෝට්ටුව ගොඩබිම වෙත ඇදගෙන යමින් ශීත මුහුදු ජලයේ පැය තුන හමාරකට අධික කාලයක් පිහිනීමෙන් සිය ජීවිතය බේරා ගැනීමට සමත් වුවාය.

ඇඳිවත පමණක් ඇතිව සිරියාවෙන් ග්‍රීසියට පලා ආ  යුස්රා මර්දිනි 2016 රියෝ ඔලිම්පික් තරගාවලියේ සරණාගතයන් වෙනුවෙන් වෙන් වූ කණ්ඩායම නියෝජනය කිරීමට වරම් ලබා සිටින ක්‍රීඩිකාවකි.