ආණ්ඩුවේ ලැජ්ජා සහගත ක්‍රියාව ගැන කැෆේ සංවිධානය කියයි.
පළාත් සභා ඡන්ද විමසීම කල් දමා ගැනීම සදහා ආණ්ඩු පක්ෂයේ පාර්ලිමේන්තු මන්ත්‍රීවරුන් සීමා නිර්ණය කමිටු වාර්තාව පාර්ලිමේන්තුවේ සම්මත කර ගැනීම වැලැක්වීමට කටයුතු කිරීම ලැජ්ජා සහගත ක්‍රියාවක් බව නිදහස් හා සාධාරණ මැතිවරණයක් සදහා වූ ජනතා ව්‍යාපාරය හෙවත් කැෆේ සංවිධානය නිවේදනයක් නිකුත් කරමින් සඳහන් කර සිටී.
එම නිවේදනයේ සදහන් වන්නේ “වත්මන් රජය පළාත් සභා ඡන්දය දින නියමයක් නොමැතිව කල් දමා ගැනීමට ලැජ්ජා සහගත උත්සාහයක නිරත වෙමින් සිටින බවත් වත්මන් පළාත් සභා ඡන්ද ක්‍ර‍මය පාර්ලිමේන්තුවේ පස්සා දොරින් ගෙන ඒමට කටයුතු කළ දේශපාලන පක්ෂ පවා දැන් දුෂිත මනාප ඡන්ද ක්‍ර‍මය වඩා යහපත් බවට ප්‍ර‍කාශ කරමින් පළාත් සභා කල් දමා ගැනීමට කටයුතු කරන බවත්ය.
එමෙන්ම බලය බෙදා හැරීමේ ව්‍යවහාරයක් ලෙස ඇති කරනු ලැබූ ‘පළාත් සභා ක්‍ර‍මය‘ ආපසු හරවමින් නැගෙනහිර පළාතට මහජන නියෝජිතයින් පත් කර ගැනීමට නොහැකි තත්වයක් උද්ගතවීමවීම පිළිබද ද්‍ර‍විඩ ජාතික සන්ධානය හා විපක්ෂ නායක ආර්.සම්බන්ධන් කිසිඳු මැදිහත්වීමක් සිදු නොකිරීම පිළිබද කැෆේ සංවිධානයේ සිය කනස්සල්ල පළ කර සිටී.