ඉදිරි පළාත් පාලන මැතිවරණයේදී කාන්තා නියෝජනය සියයට 25 දක්වා වර්ධනය කිරීමට වත්මන් රජය පියවර ගෙන ඇති බවත් ඒ ආකාරයට එළැඹෙන පළාත් සභා මැතිවරණයේදී සහ පාර්ලිමේන්තු මැතිවරණයේදී ඊට සාපේක්ෂව කාන්තා නියෝජනය වර්ධනය කිරීමට කටයුතු කරන බවත් කාන්තා සහ ළමා කටයුතු අමාත්ය පාර්ලිමේන්තු මන්ත්රිවරියන්ගේ සංසදයේ සභාපතිනි චන්ද්රානි බණ්ඩාර පවසයි.
කාන්තාවන්ගේ ආරක්ෂාව හා සුබ සාධනය සඳහා වත්මන් රජය පක්ෂ, ආගම්, ජාති භේදයකින් තොරව සැලකිය යුතු කාර්යභාර්යක් ඉටුකර ඇතැයි පෙන්වා දෙන අමාත්යවරිය රටේ යහපාලනය, ප්රජාතන්ත්රවාදය හා සංවර්ධනය උදෙසා කාන්තා දායකත්වය වැඩි වැඩියෙන් ලබා ගැනීමට අවශ්ය පසුබිම සකස් කිරීමට පියවර ගෙන තිබෙන බවත් සඳහන් කර සිටියි. අමාත්යවරිය මේ අදහස් කියා සිටියේ ශ්රී ලංකා පාර්ලිමේන්තු මන්ත්රිවරියන්ගේ සංසදයේ මෙහෙයවීමෙන් අන්තර්ජාතික කාන්තා දින උත්සවය පසුගියදා (22දා) කිලිනොච්චිය සමුපකාර මන්දිර ශ්රවණාගාරයේදී පැවැත්වූ අවස්ථාවේදී ය.