වර්ණ සංකේත සටහන් නොවූ බීම බෝතල් වෙළඳපොලේ.
බීම වර්ගවල අන්තර්ගත සීනි පාලනය කිරීම සඳහා සෞඛ්‍ය අමාත්‍යාංශය හඳුන්වා දුන් වර්ණ සංකේත සටහන් නොකළ බීම බෝතල් 4000කට වැඩි සංඛ්‍යාවක් වෙළඳපොලෙන් සොයාගෙන තිබේ.
ජාතික ආහාර සුරක්ෂිතතා සතියට සමගාමීව මහජන සෞඛ්‍ය පරික්ෂකවරුන් සිදුකළ වැටලීම්වලින් අනතුරුවයි මෙම බීම බෝතල් සොයා ගනු ලැබුවේ.
බීම වර්ගවල සීනි පාලනය කිරීම සඳහා සෞඛ්‍ය අමාත්‍යාංශයේ ආහාර පාලන ඒකකය පසුගියදා විශේෂ නීතියක් හඳුන්වා දුන්නේය.
ඒ අනුව සීනි වැඩි සිසිල් බීම සඳහා රතු වර්ණයත්, මධ්‍යම ප්‍රමාණයේ සීනි ඇතුළත් සිසිල් බීම සඳහා කහ වර්ණයත්, අඩු සීනි ප්‍රමාණයක් අඩංගු සිසිල් බීම සඳහා කොළ වර්ණයත් පාරිභෝගිකයාට පැහැදිලිව දර්ශනය වන ආකාරයෙන් බීම බෝතල්වල අදාළ වර්ණ ලේබලය ප්‍රදර්ශනය කළ යුතු බවයි එම ඒකකය සඳහන් කළේය.
මේ අතර ආහාර සුරක්ෂිතතා සතිය ක්‍රියාත්මක කිරීම තුළ ඊයේ දිනයේ පමණක් ආහාර නිෂ්පාදන සහ අලෙවි කරන ස්ථාන 3921 ක් පරීක්ෂාවට ලක් කළ බව ශ්‍රී ලංකා මහජන සෞඛ්‍ය පරීක්ෂක නිලධාරීන්ගේ සංගමය පැවැසුවේ ය.