ප‍්‍රසූත නිවාඩු කප්පාදු කිරීමට තැත්කරන ආණ්ඩුවකට කාන්තා දිනය සැමරීමට අයිතියක් නැහැ.
වත්මන් ආණ්ඩුව පසුගියදා උපාධිධාරීන් අභ්‍යාසලාභීන් ලෙස රාජ්‍ය සේවයට බදවා ගන්නා ලදී. ඉන් පළමු කණ්ඩායම ලෙස 2020 සැප්තැම්බර 2 වැනිදා 50177ක් ද පෙබරවාරි 1 දින 8076 බදවා ගන්නා ලදී. ඉන් පළමු කණ්ඩායමේ බදවාගත් උපාධිධාරීන් ඇතුරින් 38760ක් උපාධිධාරිනියන් ය.
මෙසේ බදවාගත් උපාධිධාරිනිටන්ට ලබාදෙන ප‍්‍රසූත නිවාඩු සති 6කි. සාමාන්‍යයෙන් රාජ්‍ය හා පෞද්ගලික දෙඅංශයේම ප‍්‍රසූත නිවාඩු වැඩකරන දින 84 අනිවාර්යයෙන් මෙතෙක් ලබාදෙන ලදී. විශේෂයෙන් 2018 සහ 2019 බදවාගත් අභ්‍යාසලාභී උපාධිධාරිනියන්ටද දින 84ක ප‍්‍රසූත නිවාඩු කාලය හිමි විය. මාස 6 අනිවාර්යයෙන් මව්කිරි දීමට වෛද්‍යවරු පවා නිර්දේශ කර තිබියදී ආණ්ඩුව මෙසේ අත්තනෝමතික ලෙස නිවාඩු කප්පාදු කර ඇත.
මේ සම්බන්ධයෙන් 2020 සැප්තැම්බර් 7 දින මානව හිමිකම් කොමිසමට පැමිණිල්ලක් ඉදිරිපත් කළ අතර මේ පිළිබද ජනාධිපති, අගමැති ඇතුළු සියලු බලධාරීන් දැනුවත් කරන ලදී. අමතරව සියලු වෘත්තීය සමිති, බහුජන හා කාන්තා සංවිධාන එක්ව විරෝධතා කි‍්‍රයාමාර්ග ගන්නා ලදී.
මේ අතර 2020 දෙසැම්බර් 24 දින රාජ්‍ය සේවා පළාත් සභා හා පළාත් පාලන අමාත්‍ය ජනක බණ්ඩාර තෙන්නකොන් විසින් අමාත්‍යාංශ ලේකම් වෙත් ලිපියක් මගින් දන්වා ඇත්තේ දින 84 ප‍්‍රසූත නිවාඩු ලබාදීමට අදාළ කැබිනට් සංදේශය කඩිනමින් සකස් කර ඉදිරිපත් කරන ලෙසයි. නමුත් මාස 3ක් ආසන්න වෙතත් ඒ කිසිවක් සිදුව නැත. ඛේදවාචකය වන්නේ ලේකම් එවැනි ලිපියක් ලද බවක් පිලිනොගැනීමයි (ලිපියි මේ සමග ඇත. ඇමතිවරයාගේ නියෝගයක් පිලිනොගන්නා ලේකම් කෙනෙක් සිටින ආණ්ඩුවකි මේ.)
මේ අතර මානව හිමිකම් කොමිසමට කළ පැමිණිල්ලට අදාළ පරීක්ෂණ කටයුතු මාර්තු මස 12 පස්වරු 11.30 සිදුවන බව අප වෙත් ලිඛිතව (සිතාසි) එවා ඇත. එම අවස්ථාව සදහා ඒකාබද්ධ සංවර්ධන නිලධාරී මධ්‍යස්ථානය සහ අමාත්‍යාංශ ලේකම්වරයා කැදවා ඇත.
ජාත්‍යන්තර කාන්තා දිනය ආණ්ඩුව සමරනු ලබන්නේ මවගේ අයිතියක් සහ දරුවාගේ අයිතියක් නැති කරමිනි. ආණ්ඩුවට කාන්තා දිනය සැමරීමට අයිතියක් කොයින් ද? නැවතත් අවධාරණය කරන්නේ ආයතන සංග‍්‍රහය තුළ හිමි ප‍්‍රසූත නිවාඩු වැඩකරන දින 84 කාලය ලබාදෙන ලෙසයි.
ලේකම්
ධම්මික මුණසිංහ
ඒකාබද්ධ සංවර්ධන නිලධාරී මධ්‍යස්ථානය