අන්තර් ආසියාතික වෙළෙදාම පුළුල් කරමු. අගමැති රනිල් කියයි
සමාජ සාධාරණත්වය සහ වෙළදපොල ආර්ථිකයේ සමානාත්මතාවය මෙන්ම ආගමික අන්තවාදයද කරලියට පැමිණ ඇති මෙවන් යුගයකල අපේ රටවල් සාරවත් කළ හැක්කේ අපේ ඓතිහාසික වෙළඳ පසුබිමල ගෝලීයකරණයේ බහුවිධ බලපෑම් සහ අනාගමික බටහිර රටවල ආර්ථික ක්‍රමවේද තුල අපිට අනන්‍ය වූ ආගමික ආචර ධර්ම හා සිරිත් විරිත්, වර්තමාන අභියෝග සහ අවස්ථා යන සියලු ක්‍රමවේදයන්ගේ සහ සංස්කෘතීන්ගේ සම්මුතියක් පිළිගනිමින් සිදු කෙරෙන සංවාදයක් ඔස්සේ බව අග්‍රාමාත්‍ය රනිල් වික්‍රමසිංහ පැවසී ය.
ඉන්දුනීසියාවේ ජකර්තා සම්මන්ත්‍රණ මධ්‍යස්ථානයේදී 12 වන ලෝක ඉස්ලාමික ආර්ථික සමුළුවේ සමාරම්භක සැසිය අමතමින් අග්‍රාමාත්‍යවරයා ප්‍රකාශ කළේ සමස්ත ආසියානු කලාපයේම වර්ධනයට තුඩුදෙන මූලික සාධකය වන්නේ මීළඟ සියවසේදී අන්තර් ආසියාතික වෙළෙදාම පුළුල් කිරීම බවය. ඉදිරි දශකයේදී අන්තර් ආසියානු වෙළෙඳ බාධක ඉවත් කිරීමේ වැදගත් පියවර සිදුවන බව දැකිය හැකි බවත් ඔහු පෙන්වා දුන්නේය.
මේ පසුබිම මත ඉන්දිය සාගරයේ භූ ආර්ථික මධ්‍යස්ථානයක් බවට පත්වීමේ බලාපොරොත්තුව සහිතව, යටිතල පහසුකම් සඳහා වූ දැවැන්ත සැලස්මක් හා බැඳුණු මහා පරිමාණ ආර්ථික ප්‍රතිසංස්කරණ සමුදායක් හඳුන්වාදීමට ශ්‍රී ලංකාව ක්‍රියා කරන බව පෙන්වා දුන් අග්‍රාමාත්‍යවරයා ශ්‍රී ලංකාවේ ප්‍රධාන දේශපාලන පක්‍ෂ දෙකෙන්ම සැදුම්ලත් ජාතික රජයක් ජනාධිපතිවරයාගේ නායකත්වයෙන් පිහිටුවා ඇත්තේ දේශපාලනික ස්ථාවරත්වය පමණක් නොව ස්ථාවර ආර්ථික වැඩ රාමුවක් ඇති කිරීමේ ද්වි පාර්ශ්වික එකඟතාවක් ද ඇති කර ගැනීම සඳහා යැයි ද පැවසීය.
මැලේසියානු අග්‍රාමාත්‍ය ලෝක ඉස්ලාමික ආර්ථික සමුළුවේ අනුශාසක දතෝ ශ්‍රී මොහොමඩ් නජිබ් තුන් අබ්දුල් රසාක් ප්‍රකාශ කළේ ඉස්ලාම් දහම සමඟ ත්‍රස්තවාදයේ කිසිදු සම්බන්ධතාවක් නැති බවය. සැබෑ ඉස්ලාම් භක්තිකයා ත්‍රස්තවාදය පිළිකුල් කරන බවත්, ඉස්ලාම් දහම කරුණාව හා දයාව පදනම් කොට ගෙන ගොඩනැඟුනක් බවත් ඔහු අවධාරණය කළේය. විදේශීය බලපෑම්වලින් තොරව ප්‍රජාතන්ත්‍රවාදී පාලනයක් පවත්වාගෙන යෑමේ අශ්‍යතාව සෑම ඉස්ලාම් රාජ්‍යයකටම තිබිය යුතු බවද ඔහු පෙන්වා දුන්නේය.