ඉතාලිය, දකුණු කොරියාව සහ ඉරානයෙන් එන අයගෙන් සල්ලි ගන්නේ නැහැලු
ඉතාලිය, දකුණු කොරියාව සහ ඉරානය යන රටවල සිට ශ්‍රී ලංකාවට පැමිණෙන මගීන්ගේ නිරෝධායන කටයුතු වෙනුවෙන් කිසිදු ගාස්තු අයකිරීමක් සිදු නොකරන බව රජය තහවුරු කරයි.
දකුණු කොරියාව, ඉරානය සහ ඉතාලියේ සිට මෙරටට පැමිණෙන මගීන් නිරෝධයනය කිරිමේ වැඩපිලිවෙල දකුණු කොරියාවේ සිට පැමිණි ගුවන් මගීන්ගෙන් ආරම්භ කරනු ලැබීය. ඒ අනුව ගුවන්තොටුපලට පැමිණෙන මගීන් විෂබීජහරනයට ලක්කර බස් රථ මගින් කන්දකාලු සහ පූනායි නිරෝධායන මධ්‍යස්ථාන වෙත යොමු කරනු ලැබීය.
ශ්‍රී ලංකාවට පැමිණි මගීන්ගෙන් 37 ක් කන්දකාඩු නිරෝධායන මධ්‍යස්ථානයට සහ 131 ක් පූනායී නිරෝධායන මධ්‍යස්ථාන වෙත යොමු කිරීමට පියවර ගනු ලැබූ බව හමුදා ප්‍රකාශක බ්‍රිගේඩියර් චන්දන වික්‍රමසිංහ පවසයි.
මෙම පිරිසට අවශ්‍ය සුළු වෛද්‍ය පහසුකම් එම පරිශ්‍රයේදීත්, අනෙකුත් වෛද්‍ය පහසුකම් අවශ්‍ය වෙතොත් ඒවා රෝහල්වලින් ලබා දීමටත් කටයුතු කරන අතර දින 14 ක නිරෝධායන ක්‍රියාවලියකින් පසු ඔවුන් මෙම නිරෝධායන මධ්‍යස්ථානවලින් නිදහස් කිරීමටත් පියවර ගෙන ඇත.
මේ දක්වා සිදුකළ පරිදි අනෙකුත් රටවලින් පැමිණෙන මගීන් දින 14 ක පසුවිපරම තවදුරටත් ක්‍රියාතමකව පවතී. මේ වන විට සෞඛ්‍ය වෛද්‍ය නිලධාරීන්ගේ හා මහජන සෞඛ්‍ය පරීක්ෂකවරුන්ගේ අධීක්ෂණය යටතේ 3900 ක පමණ පිරිසක් පසු විපරමට ලක් වෙමින් පවතී.
එමෙන්ම විදෙස් රටවල සිට ශ්‍රී ලංකාවට පැමිණි අයගෙන් දින 14 ක් යනතුරු විවධ උත්සව හා සංචාර සඳහා නොගොස් නිවසේ රැඳී සිටින ලෙස ඉල්ලීමක්ද කරනු ලැබීය.
රට තුළට ඇතුළුවන සියළුම මගීන්ගේ ශරීර උෂ්ණත්වය තර්මල් ස්කෑන් යන්ත්‍රය මගින් පරීක්ෂාවකට ලක් කිරීමට පියවර ගෙන ඇත. එහිදී සෑම මගියෙක්ම මෙම තර්මල් ස්කෑන් යන්ත්‍රය හරහා ගමන් කරවීම මගින් මෙම පරීක්ෂාව සිදු කෙරෙන අතර දැනට බණ්ඩාරනායක ජාත්‍යන්තර ගුවන්තොටුපලේ මෙම ස්කෑන් යන්ත්‍ර 03 ක් සවිකර තිබේ.
මීට අමතරව ශ්‍රී ලංකාවට පැමිණෙන සියලුම ගුවන් මගීන්ට දත්ත පත්‍රිකාවක් ලබා දීම මගින් තොරතුරු ලබා ගැනීමක් සිදු කෙරේ. එහිදී විශේෂයෙන්ම පසුගිය දින 14 තුළ මෙම මගීන් ගමන් ගත් රටවල් පිළිබඳ තොරතුරු සහ අදාළ මගියා පැමිණි රට පිළිබඳව තොරතුරු ලබා ගැනීමට පියවර ගෙන ඇත.
මෙහිදී විශේෂයෙන්ම චීනය, දකුණු කොරියාව, ඉතාලිය, ඉරානය වැනි දැනට කොරෝනා රෝගය පැතිර යන රටවල් පිළිබඳව තොරතුරු ලබා ගෙන එම තොරතුරු සෞඛ්‍ය අමාත්‍යාංශයේ වසංගත රෝග ඒකකයට ලබා දීමට පියවර ගෙන තිබේ. එම තොරතුරු අදාළ ප්‍රදේශයේ සෞඛ්‍ය වෛද්‍ය කාර්යාලය වෙත දැනුවත් කෙරේ. අනතුරුව අදාළ මහජන සෞඛ්‍ය පරීක්ෂකවරු මෙම මගීන්ගේ නිවෙස්වලට යාම මගින් ඔවුන්ගේ නිවෙස්වලදී දින 14 ක් තුළ ඔවුන්ව පරීක්ෂාවට ලක් කරයි. එහිදී රෝග ලක්ෂණ තිබේද යන්න පිළිබඳව දැඩි පසුවිපරමක් සිදු කරනු ලබන අතර රෝග ලක්ෂණ මතුවුව හොත් ඔවුන් රෝහල් වෙත යොමු කිරීමට පියවර ගෙන ඇත.
මෙම කාර්යය සාර්ථක කර ගැනීම සඳහා ගුවන්තොටුපලේ වෛද්‍ය නිලධාරීන් මහජන සෞඛ්‍ය පරීක්ෂකවරු සේවයේ යොදවා ඇති අතර මගීන් පැමිණෙන දිනයේදීම මෙම තොරතුරු ලබා ගනියි.
මීට අමතරව සිංහල,දෙමළ, ඉංග්‍රීසි සහ චීන බසින් විශේෂයෙන්ම ගුවන් මගීන් සඳහා විශේෂයෙන් සකස් කරන ලද තොරතුරු ලබා ගැනීමක් ද සිදු කෙරේ.
ලෝක සෞඛ්‍ය සංවිධානයේ දත්ත අනුව ඉතාලිය, දකුණු කොරියාව, චීනය ඇතුළු නව කෙරෝනා වෛරසය (COVID – 19) සීඝ්‍රයෙන් පැතිර යන රටවල සිට පැමිණෙන ශ්‍රි ලාංකිකයින් පිළිබඳව යොමු කරන ලෙස සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා විසින් අධ්‍යාපන අමාත්‍යාංශයට දන්වා යවා ඇත.
ඒ අනුව නව කොරෝනා වෛරසය (COVID – 19) පැතිර යන විදේස් රටවල සිට පැමිණෙන පාසල් දරුවන්, ඔවුන්ගේ දෙමව්පියන් සහ ඥාතීන් පිළිබඳව අවධානයෙන් සිටින ලෙස හා ඔවුන් දින 14 ක නිරෝධායන කාර්ය සඳහා යොමු වී ඇත්ද යන්න පිළිබඳව සොයා බලන ලෙස පළාත් සහ අධ්‍යාපන කලාපයේ සියලු පරිවේණාධිපති ස්වාමීන් වහන්සේලා සහ පාසල් ප්‍රධානීන් දැනුවත් කිරීමට අවශ්‍ය කඩිනම් පියවර ගන්නා ලෙස අධ්‍යාපන අමාත්‍යාංශයේ ලේකම් එන්.එච්.එම්. චිත්‍රානන්ද විසින් සියලුම පළාත් අධ්‍යාපන අධ්‍යක්ෂවරු සහ කලාප අධ්‍යක්ෂවරුන් වෙත චක්‍රලේඛයක් මගින් දන්වා යැවීමට පියවර ගෙන තිබේ.
සෞඛ්‍ය අමාත්‍යාංශය සමඟ ඒකාබද්ධව මෙම රෝගය පැතිර යෑම වැළැක්විමට පියවර ගත යුතු ආකාරය පිළිබඳව සිසුන්, දෙමව්පියන්, ආදි සිසුන් ඇතුළු පාසල් ප්‍රජාව දැනුවත් කරන ලෙස එම චක්‍රලේඛය මගින් වැඩි දුරටත් දන්වා යවා ඇත.
සෞඛ්‍ය අධ්‍යක්ෂ ජනරාල් සමඟ කරන ලද සාකච්ඡාවකින් අනතුරුව සිංහල/ බෞද්ධ, සිංහල/හින්දු සහ කතෝලික බැතිමතුන්ගේ දඹදිව වන්දනා ගමන් අත්හිටුවා ඇති බව බුද්ධ ශාසන අමාත්‍යාංශයේ ලේකම් බන්දුල හරිශ්චන්ද්‍ර පවසයි.