ලංකාවේ ප්රථම නියෝජ්ය පොලිස්පතිනි ධුරයට උසස් කරන ලද බිම්ශානි ජාසිංහආරච්චිගේ වෘත්තීය අයිතිවාසිකම් සහ රැකියාවේ සුරක්ෂිතභාවය වෙනුවෙන් තම සංසදය පක්ෂ භේදයකින් තොරව පෙනී සිටින බවත්, ඇය වෙනුවෙන් සාධාරණය ඉෂ්ට වන තෙක් සටන් කරන බවත් පාර්ලිමේන්තුවේ කාන්තා මන්ත්රීවරියන්ගේ සංසදය නිවේදනය කරයි.
පොලිස් ළමා හා කාන්තා කාර්යංශයේ අධ්යක්ෂවරිය ලෙස කටයුතු කළ බිම්ශානි ජාසිංහආරච්චිගේ පත්වීම අභියෝගයට ලක් කිරීම හෙළා දකින බවද එම සංසදයේ සභාපතිනි ප්රාථමික සෞඛ්ය සේවා, වසංගත රෝග හා කොවිඩ් රෝග පාලන කටයුතු රාජ්ය අමාත්ය වෛද්ය සුදර්ශනී ප්රනාන්දුපුල්ලේ පැවසීය.
ඇය මේ බව සඳහන් කළේ ඊයේ (18) පාර්ලිමේන්තුවේදී මාධ්ය හමුවක් පවත්වමිනි. එම මාධ්ය සාකච්ඡාවට අමාත්ය වෛද්ය සුදර්ශනී ප්රනාන්දුපුල්ලේ, රාජ්ය අමාත්ය වෛද්ය සීතා අරඹේපොල , සමගි ජන බලවේගයේ පාර්ලිමේන්තු මන්ත්රීනි රෝහිණි විජේරත්න සහ පාර්ලිමේන්තුවේ නියෝජ්ය මහ ලේකම් සහ කාර්ය මණ්ඩල ප්රධානී කුෂාණි රෝහණදීර ද සහභාගි විය.