ඉම්රාන් ඛාන් පැමිණෙයි…….ගිවිසුම් 05කටත් අත්සන් තබයි.
පාකිස්තාන අග්‍රාමාත්‍ය ඉම්රාන් ඛාන් ඇතුළු එරට දූත පිරිස ගරු අග්‍රාමාත්‍ය මහින්ද රාජපක්ෂ විසින් කටුනායන බණ්ඩාරනායක අන්තර්ජාතික ගුවන් තොටුපළ පරිශ්‍රයේ දී අද 2021.02.23 දින පස්වරුවේ ඉමහත් හරසරින් පිළිගනු ලැබුවේය.
අග්‍රාමාත්‍ය මහින්ද රාජපක්ෂගේ ආරාධනාවකට අනුව දෙදින නිල සංචාරයක් සඳහා පාකිස්තාන අග්‍රාමාත්‍ය ඉම්රාන් ඛාන් ඇතුළු දූත පිරිස මෙරටට පැමිණියහ.
පාකිස්තානයට ක්‍රිකට් ලෝක කුසලානය දිනා දීමට සමත් වූ ඉම්රාන් ඛාන් එරට 22වැනි අග්‍රාමාත්‍යවරයාය. අග්‍රාමාත්‍යධූරයට පත්වීමෙන් පසු ඉම්රාන් ඛාන් ශ්‍රී ලංකාවේ සංචාරයේ යෙදෙන පළමු අවස්ථාව මෙන්ම 2021 වසරේ එතුමාගේ පළමු විදෙස් නිල සංචාරය ද මෙය වේ.
කටුනායක අන්තර්ජාතික ගුවන්තොටුපළට පැමිණි පාකිස්තානු අග්‍රාමාත්‍ය ඉම්රාන් ඛාන් වෙනුවෙන් හමුදා වෙඩිමුර 19ක් සහ හමුදා සම්මාන ආචාර පෙළපාලියක් ද පැවැත්විණි. ආරක්ෂක මාණ්ඩලික ප්‍රධානි සහ යුද හමුදාපති ජෙනරාල් ශවේන්ද්‍ර සිල්වා ඇතුළු ජ්‍යෙෂ්ඨ හමුදා නිලධාරින් ඊට එක්වූහ.
අනතුරුව පාකිස්තානු අග්‍රාමාත්‍යවරයා ගුවන්තොටුපළෙහි වූ සුවිශේෂී අමුත්තන්ගේ සමරු සටහන් පොතෙහි (Golden Book) සටහනක් තැබුවේය. අනතුරුව අග්‍රාමාත්‍යවරුන් දෙදෙනාගේ සහභාගිත්වය ඇතිව දෙරට අතර ආර්ථික හා වෙළඳ, ආයෝජන, කාර්මික තාක්ෂණ, අධ්‍යාපන ඇතුළු ක්ෂේත්‍ර කිහිපයක ගිවිසුම් 5 ක් අත්සන් තැබීමට නියමිතය.
පාකිස්තානු විදේශ හා වාණිජ අමාත්‍යවරුන් ඇතුළු විශාල වෙළඳ දූත පිරිසක් පාකිස්තානු අග්‍රාමාත්‍යවරයා සමඟ මෙරටට පැමිණ තිබේ.
පාකිස්තාන අග්‍රාමාත්‍ය ඉම්රාන් ඛාන් හෙට (24) දිනයේ දී අතිගරු ජනාධිපති ගෝඨාභය රාජපක්ෂ හමුවීමට නියමිතය. අනතුරුව කොළඹ දී පැවැත්වෙන වෙළඳ හා අයෝජන සමුළුවට එක්වන අග්‍රාමාත්‍ය ඉම්රාන් ඛාන් නැවත සිය රට යාමට පෙර ශ්‍රී ලාංකේය ක්‍රීඩකයන් හමුවනු ඇත.
මෙම අවස්ථාවට ශ්‍රී ලංකාවේ විදේශ අමාත්‍ය දිනේෂ් ගුණවර්ධන ඇතුළු කැබිනට් අමාත්‍යවරුන්, රාජ්‍ය අමාත්‍යවරුන්, මන්ත්‍රීවරුන් හා අග්‍රාමාත්‍ය කාර්යය මණ්ඩල ප්‍රධානී යෝෂිත රාජපක්ෂ හා ජ්‍යෙෂ්ඨ රාජ්‍ය නිලධාරීන් විශාල පිරිසක් එක්ව සිටියහ.
අග්‍රාමාත්‍ය මාධ්‍ය ලේකම්.