ගප්ටිල්ගෙන් සුපිරි පිතිහරඹයක්.

තරග පහකින් සමන්විත සංචාරක දකුණු අප්‍රිකා කණ්ඩායම සමග පැවැති සිව්වැනි එක්දින තරගයේදී නවසීලන්ත ආරම්භක පිතිකරු මාටින් ගප්ටිල්ගේ සුපිරි පිතිහරඹය හේතුවෙන් කඩුළු හතක ජයග්‍රහණයක් ලැබීමට නවසීලන්ත කණ්ඩායම සමත් විය.

ගප්ටිල් පන්දු 138 කදී හයේ පහර 11ක් හා හතරේ පහර 15ක් සමගින් වේගවත් ලකුණු 180ක් රැස් කිරීමට සමත් විය. ලකුණු 279ක ඉලක්කයක් හඹා ගිය නවසීලන්ත කණ්ඩායම පන්දුවාර 45කදි කඩුලු 3ක් පමණක් දැවී එම ඉලක්කය පසු කර යෑමට සමත් විය. ගප්ටිල්ට අනගි සහායක් ලබා දෙමින් රෝස් ටේලර් ලකුණු 66ක් රැස්කිරීමට සමත් වූ අතර ඔවුන් දෙදෙනා අතර තෙවැනි විකට්ටුවේ සබඳතාවය ලකුණු 180කි.

කාසියේ වාසිය දිනා පළමුවෙන් පන්දුවට දකුණු අප්‍රිකා කණ්ඩායම නියමිත පන්දුවාර 50 අවසානයේදී කඩුලු 08ක් දැවී ලකුණු 279ක් රැස් කිරීමට සමත් වූ අතර නායක ඒබී.ඩී. විලියර්ස් පන්දු 59කදී හයේ පහර 3ක් හා හතරේ පහර 4ක් සමගින් නොදැවී ලකුණු 72ක් රැස් කිරීමට සමත් විය. ඔහුට අමතරව ෆප් ඩු ප්ලෙසි ලකුණු 67ක්, හෂීම් අම්ලා ලකුණු 40ක්  රැස් කිරීමට සමත් විය.

තරග පහකින් සමන්විත එක්දින තරගාවලි මේ වනවිට කණ්ඩායම් දෙකම තරග දෙක බැගින් ජයගෙන සිටී. තරගයේ වීරයා නවසීලන්ත ආරම්භක පිතිකරු මාටින් ගප්ටිල්ට හිමි විය.