දොම්පෙ ප්‍රාදේශීය සභාවේ හිටපු සභාපති මිලාන්ගේ ලක්ෂ70ක අල්ලස් නඩුව විභාගයට.
කළුගල් කැඩීම් බලපත්‍රයක් හා වෙළෙඳ බලපත්‍රයක් ලබාදීමට ව්‍යාපාරිකයකුගෙන් රුපියල් ලක්ෂ හැත්තෑවක මුදලක් ඉල්ලා අවස්ථා දෙකකදී ඉන් රුපියල් ලක්ෂ 06ක මුදලක් අල්ලස් ලෙස ලබාගැනීම ඇතුළු අධි චෝදනා 08ක් යටතේ දොම්පෙ ප්‍රාදේශීය සභාවේ හිටපු සභාපතිවරයාට හා එම ප්‍රාදේශීය සභාවේ හිටපු මන්ත්‍රීවරයකුට එරෙහි නඩුව ලබන නොවැම්බර් 28 දින විභාගයට ගැනීමට කොළඹ මහාධිකරණ විනිසුරු ඒ. ඒ. ආර්. හෙයියන්තුඩුව තීරණය කර ඇත.
එදිනට නඩුවේ පැමිණිල්ලේ සාක්කිකරුවනට අධිකරණය හමුවේ පෙනී සිටින ලෙස දන්වා සිතාසි නිකුත් කිරීමට විනිසුරුවරයා කොළඹ මහාධිකරණ රෙජිස්ටාර්වරයාට නියෝග කළේය.
අධිකරණ ඇප මත සිටින දොම්පේ ප්‍රාදේශීය සභාවේ හිටපු සභාපති විදාන පතිරණගේ මිලාන් සජිත් ජයතිලක හා දොම්පෙ ප්‍රාදේශීය සභාවේ හිටපු මන්ත්‍රී කැකුල් කොටුවගේ දොන් අජිත් සිසිර කුමාර යන විත්තිකරුවන් ඊ අධිකරණය හමුවේ පෙනී සිටියහ.
අල්ලස් හෝ දූෂණ චෝදනා පනතේ 11 වගන්තිය යටතේ අල්ලස් හෝ දූෂණ චෝදනා විමර්ශන කොමිසම විත්තිකරුවනට එරෙහිව මෙම නඩුව පවරා ඇත.
නඩුව ඔප්පු කිරීම සඳහා සාක්කි 22ක් හා ලේඛන 16ක් ඉදිරිපත් කිරීමට බලාපොරොත්තු වන බව අල්ලස් හෝ දූෂණ චෝදනා විමර්ශන කොමිසම අධිකරණයට දන්වා ඇත.