මහනුවර දී දෙවන හදවත් බද්ධ සැත්කමත් සිදු කිරීමට පියවර. පැවැති ගැටලු අවසන්.
මහනුවර ශික්ෂණ රෝහලේ දී සිදු කිරිමට නියමිත දෙවන හදවත් බද්ධ සැත්කම කණ්ඩායම් හැගීමෙන් යුතුව කඩිනම්න් සිදු කරන බව එම රෝහලේ ශල්‍ය හා නිර්වින්දන විශේෂඥ වෛද්‍යවරු සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්නට පොරොන්දවී ඇති බව වාර්ථා වේ.
මහනුවර ශික්ෂණ රෝහලේ දී සිදු කිරිමට නියමිතව තිබූ දෙවන හදවත් බද්ධ සැත්කම සිදු කිරීමට යාමේ දී මුහුණ දුන් ගැටලු පිළිබදව සොයා බැලීම සදහා සෞඛ්‍ය අමාත්‍යවරයාගේ ප්‍රධානත්වයෙන් සෞඛ්‍ය අමාත්‍යාංශයේ දී විශේෂ සාකච්ඡාවක් පැවැත්විනි. එම හදවත් බද්ධ සැත්කම සිදු කිරිම සදහා අවශ්‍ය Cardiac Output Monitoring Probe with pulmecuary Eunctiong උපකරණ 02 ක් දින 03 ක් තුල කඩිනමින් මිල දී ගෙන මහනුවර මහ රෝහල ලබාදෙන ලෙස සෞඛ්‍ය අමාත්‍යවරයා ජීව වෛද්‍ය ඉංජිනේරු අංශයට දැනුම් දෙන ලදි. තව ද Cardiac Output Monitoring යන්ත්‍රයක් මහනුවර මහ රෝහලේ නිර්වින්දන අංශයට කඩිනමින් මිල දී ගෙන ලබාදීමට ද මෙහිදී තීන්දු කෙරිනි. එම යන්ත්‍ර ශ්‍රී ලංකාවට ආනයනය කරන සමාගමේ ප්‍රධානීන්ට ද සෞඛ්‍ය අමාත්‍යවරයා දුරකථනයෙන් කථා කර යන්ත්‍රය කඩිනමින් ගෙන්වා දෙන ලෙස ඉල්ලා සිටියේය. තවද නිර්වින්දන වෛද්‍ය කටයුතු සදහා අවශ්‍ය රසායනික සංයෝග නිර්වින්දන විශේෂඥ වෛද්‍යවරුන්ගේ ඉල්ලීම මත ඉන්දියාවෙන් කඩිනමින් ආනයනය කර ලබාදෙන ලෙස ද සෞඛ්‍ය අමාත්‍යවරයා වෛද්‍ය සැපයුම් අංශයට දැනුම් දෙන ලදි. වෛද්‍ය උපකරණ හිඟයක් ඇතිවුව හොත් සෞඛ්‍ය අමාත්‍යාංශයට දැනුම් දෙන ලෙසත්, කඩිනමින් මිල දී ගන්නා ලෙසත් සෞඛ්‍ය අමාත්‍යවරයා මහනුවර මහ රෝහලේ අධ්‍යක්ෂ වෛද්‍ය සමන් රත්නායකට දැනුම් දෙන ලදි.
මෙහිදී අදහස් දැක් වූ සෞඛ්‍ය අමාත්‍යවරයා – “ශ්‍රී ලංකාවේ වසර 50 කට පසුවයි හදවත් බද්ධ සැත්කමක් සිදු කළේ. එම හදවත් බද්ධ සැත්කම කොළඹ ජාතික රෝහලේ දී සිදු කිරීමට මම සැළසුම් කළා. නමුත් අවම පහසුකම් යටතේ මහනුවර මහ රෝහලේ දී හදවත් බද්ධ සැත්කම සිදු කළා. සෞඛ්‍ය අමාත්‍යවරයා ලෙස මම ඒ පිළිබදව බෙහෙවින්ම සතුටු වුනා. හදවත් බද්ධ සැත්කම සිදු කළ වෛද්‍ය කණ්ඩායම දැකබලා ගැනීමටත්, රෝගියා දැකබලා ගැනීමටත් මම අවස්ථා දෙකක දී මහනුවර මහ රෝහලට පැමිණියා. වෛද්යවරුන් දැඩි කැපවීමෙන් තමයි සැත්කම සිදු කර තිබුනේ. එහිදී හදවත් බද්ධ සැත්කම් සිදු කිරිම සදහා අවශ්‍ය සියලුම උපකරණ සහ යන්ත්‍ර සුත්‍ර වල ලේඛණයක් වෛද්යවරුන් විසින් මට ලබාදුන්නා. එවිට මම නිලධාරීන්ට දැනුම් දුන්නේ මෙම උපකරණ කඩිනමින් මිල දී ගන්නා ලෙසයි. නීති රීති වලට යටත් නොවී රෝගී ජිවිත බේරා ගැනීමට කටයුතු කරන ලෙස මම දැනුම් දුන්නා. නමුත් දෙවන සැත්කම සිදු කිරීමට යාමේ දී උපකරණයක් නොමැති බව වෛද්යවරුන් මට දැනුම් දුන්නා. ඒ අනුව එම උපකරණය ත්‍රිකුණාමලය කින්නියා මුලික රෝහලේ සිට මහනුවර මහ රෝහලට ලබාදීමට මම පියවර ගත්තා. නමුත් වෛද්යවරුන් මට ප්‍රකාශ කළා එම උපකරණය ශල්‍යකර්මය සදහා ප්‍රමාණවත් නොවන බව. ඉන් පසු මම මහනුවර මහ රෝහලේ අධ්‍යක්ෂ වෛද්‍ය සමන් රත්නායක මහතාට දැනුම් දුන්නා අවශ්‍ය තරම් මුදල් ලබාදෙන්නම් අවශ්‍ය උපකරණ ලබාගන්න කියලා. නමුත් ගැටලුවක් මතු වුනා. මෙම ප්‍රශ්ණය සියලුම විශේෂඥ වෛද්යවරුන් සමග අද පැවැති සාකච්ඡාවෙන් පසු නිරාකරණය කළා. සියලුම විශේෂඥ වෛද්යවරුන් කණ්ඩායම් හැගීමෙන් යුතුව රාජකාරී කරන්න.වෛද්යවරුන් අවබෝධයෙන් කටයුතු කරන්න. හදවත් බද්ධ සැත්කම සදහා හදවත් ලබාදීමට රෝගියෙක් දැනට මහනුවර මහ රෝහලේ සිටිනවා.”
මෙම සාකච්ඡාවෙන් පසු මහනුවර මහ රෝහලේ අධ්‍යක්ෂ වෛද්‍ය සමන් රත්නායක සහ හෘද රෝග ශල්‍ය විශේෂඥ වෛද්‍ය අනිල් අබේවික්‍රම කළ අදහස් දැක්වීම් වල හඬ පට ද යොමු කර ඇත.
මෙම සාකච්ඡාවට සෞඛ්‍ය ලේකම් ජනක සුගතදාස, සෞඛ්‍ය සේවා අධ්‍යක්ෂ ජනරාල් වෛද්‍ය ජයසුන්දර බණ්ඩාර, නියෝජ්‍ය අධ්‍යක්ෂ ජනරාල්වරුන් වන අමල් හර්ෂ ද සිල්වා, හේමන්ත බෙනරගම, අධ්‍යක්ෂවරුන් වන ප්‍රියන්ත අතපත්තු සහ එච්. ඒ හේරත්, මහනුවර මහ රෝහල් අධ්‍යක්ෂ සමන් රත්නායක,හෘද රෝග ශල්‍ය විශේෂඥ වෛද්‍ය අනිල් අබේවික්‍ සහ නිර්වින්දන විශේෂඥ වෛද්‍ය ඡෙගති ඇතුලු සියලුම විශේෂඥ වෛද්යවරුන් සහ වෛද්යවරුන් එක්ව සිටියහ.